Inilunsad ang Urtugrapiya ung Ayta Magbukun (Ortograpiya ng Ayta Magbukun) at Hinup: Aklat Ung Ayta Magbukun noong 13 Hunyo 2025 sa pasilidad ng Bahay-Wika sa Brgy. Bangkal, Abucay, Bataan. Ang Urtugrapiya ay naglalaman ng mga tuntunin sa pagsulat ng wikang Ayta Magbukun. Binuo ito ng mga elder mulâ sa iba’t ibang komunidad ng Ayta Magbukun sa Bataan, mga guro ng Kagawaran ng Edukasyon-Bataan, Summer Institute of Linguistics (SIL), at Komisyon sa Wikang Filipino (KWF). Samantála, mababasa sa Hinup ang mga kuwento, kanta, tula, diyalogo, at listahan ng mga salitang Magbukun. Mayroon din itong mga larawan na iginuhit ng mga miyembro ng komunidad. Ang dalawang aklat na ito ay binuo para makatulong sa pagpapasigla ng wikang Ayta Magbukun at magamit sa paaralan ang kanilang wika.
Bago ang paglulunsad ng dalawang aklat, isinagawa ang ebalwasyon sa ikaanim na batch ng programang Bahay-Wika at Master-Apprentice Language Learning Program (MALLP). Iniulat sa komunidad ang resulta ng progreso ng mga mag-aaral sa Bahay-Wika. Pagkaraan nito, nagsagawa ng Focus Group Discussion (FGD) sa mga guro, magulang, elders, masters, at apprentice upang masuri ang implementasyon ng programa sa loob ng isang taóng panuruan.
Isinagawa rin ang pagpaplanong pangwika ng komunidad. Target nila na sa loob ng sampung taón, mulâ 2025–2035, lahat ng Ayta Magbukun sa kanilang komunidad ay nagsasalita na ng wikang Ayta Magbukun. Naglista sila ng mga gawain at timeline kung paano ito maisasakatuparan.
Dinaluhan ito nina Indigenous Peoples Mandatory Representative (IPMR) Jay-r Reyes, Chieftain Rosita Sison, mga guro, mga elder, mga manunulat, at mga magulang. Pinangunahan ng KWF ang naturang gawain, sa pamumuno ni Arthur P. Casanova, PhD, Tagapangulo, sa ilalim ng Sangay ng Lingguwistika at Aplikadong Lingguwistika kasama sina Lourdes Z. Hinampas, Punó ng Sangay, Jennifer S. Bactol, at Rolien Mark M. Balisi, katuwang ang Provincial Tourism Office ng Bataan kasama sina Ginette Lopez at Patricia Gail R. Miranda.
Source: Beautiful Feature
0 Comments